भोजपुर । भोजपुर नगरपालिका–१२ टक्सार स्थित मालबाँसेका आगलागी पीडितहरूलाई भोजपुर नगरपालिका, वडा कार्यालय टक्सार र प्रदेश माननीय विनोद वान्तवाको तर्फबाट राहत वितरण गरिएको छ । आगलागी पीडित ५ परिवारलाई नगरपालिका र वडाको तर्फबाट अस्थायी बसोबासका लागी च्यादर, खाने पानीका लागी धारा जडान तथा हिलटेन्की, विद्युत् जडान, खाद्यान्नका लागी चामल,दाल,नुन तेल, साबुन, लत्ताकपडा आदि सामग्री प्रदान गरिएको छ भने माननीय प्रदेश सांसदको तर्फबाट खाद्यान्न सामग्री प्रदान गरिएको छ । आगलागी पीडितहरूलाई तत्काल राहत तथा उद्धारका लागी नगरपालिका तथा वडाको तर्फबाट अस्थायी आवास, तत्काललाई पुग्ने खाद्यान्न, खाने पानीका लागी धारा जडान तथा विद्युत् सेवा सञ्चालन गरेको र अन्य कार्यका लागी नगरपालिकाले प्रदेशसँग समन्वय गरेर राहत तथा पुनं निमार्णमा सहयोग गर्ने भोजपुर नगरपालिकाका मेयर कैलाश कुमार आलेले बताउनुभयो । साथै उहाले विपद्मा परेको बेला सबैले सहयोग गर्न आवश्यक रहेकाले सहयोगका लागी सबैसँग आव्हान समेत गर्नुभयो ।
आगलागीबाट स्थानीय नर बहादुर कार्की, विशाल कार्की, पदम कार्की, गजेन्द्र ब कार्की, पुष्प बहादुर कार्की, कृष्ण बस्नेत, मिना श्रेष्ठ लगायतको ७ घर, १० गोठ, लत्ताकपडा, खाद्यान्न, भौतीक सम्पत्ति जल्दा करिब १ करोड ३ लाखको बराबरको क्षति भएको थियो ।
