काठमाडौं। आज देशभर सामान्यदेखि पूर्ण बदली रहने जलवायु पूर्वानुमान गरिएको छ। दिउँसोको समयमा देशका अधिकांश स्थानहरूमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ।
कोशी, बागमती, गण्डकी र कर्णाली प्रदेशका एक–दुई स्थानमा भारी वर्षा हुन सक्ने चेतावनी दिइएको छ। यस्तै, देशको उच्च पहाडी तथा हिमाली भू-भागका थोरै स्थानहरूमा हल्कादेखि मध्यम वर्षा वा हिमपातको पनि सम्भावना रहेको बताइएको छ।
रातिको समयमा पनि देशभर साधारण बदली रहनेछ। कोशी, मधेश, बागमती, गण्डकी, लुम्बिनी र सुदूरपश्चिम प्रदेशका केही स्थानहरू तथा अन्य प्रदेशका थोरै स्थानहरूमा मेघगर्जनसहित हल्का देखि मध्यम वर्षाको सम्भावना रहेको छ। विशेषगरी कोशी र गण्डकी प्रदेशका एक–दुई स्थानमा भारी वर्षाको सम्भावना अझै कायम रहने महाशाखाले उल्लेख गरेको छ।
हाल देशभर मनसुनी वायुको सक्रियता देखिएको छ। मनसुनजन्य न्यून चापीय रेखा पूर्वी भागमा सरदर स्थानको आसपास र पश्चिमतिर सामान्यभन्दा केही उत्तरतर्फ अवस्थित रहेको मौसम विभागले जानकारी दिएको छ।
