निष्मा र सिजन बने पूर्वान्चल गट ट्यालेन्ट सिजन–५ को विजयी

भोजपुर । पूर्वान्चल गट ट्यालेन्ट सिजन–५ को उपाधि धनकुटाका सिजन भट्टराई र भोजपुरका निष्मा श्रेष्ठले जितेकी छिन् । भट्टराईले गायन र श्रेष्ठले नृत्य तर्फको उपाधि जितेका हुन् । भोजपुरकी निष्मा सगरमाथा अङ्ग्रजी बोर्डिङ स्कुलको कक्षा ४ मा अध्ययनरत छात्रा हुन् । गायनतर्फ धनकुटाको पाख्रीवासकी स्वीकृति राई द्वितीय र पाख्रीवासकै इन्वाङ राई तृतीय भएका छन् भने नृत्यतर्फ तेह्रथुमको द राइजिङ ग्रल्स द्वितीय र धनकुटाको स्क्वार्ड समूह तृतीय भएका छन् ।
कोशी प्रदेशका १४ वटै जिल्लाबाट छनौट गरिएका प्रतिभाहरु मध्ये अन्तिम प्रतिस्पर्धाका लागि नृत्य तर्फ १४ र गायन तर्फ १२ जनाले प्रतिष्पर्धा गरेका थिए ।
प्रतियोगिताको निर्णायकहरुमा गायन तर्फ गायक कृष्णभक्त राई, जुनी खालिङ्ग राई र महेश राई तथा नृत्य तर्फ युसिन यस्माली मगर र विशेष गुरुङ रहेका थिए ।