झापा। झापाको बाह्रदशी गाउँपालिका–१ खैरबारीमा असार २६ गते भएको सवारी दुर्घटनामा गम्भीर घाइते कचनकवलकी २७ वर्षीया उर्मिला राजबंशीको निधन भएको छ।
विर्तामोडस्थित बीएण्डसी अस्पतालको आइसियुमा आठ दिनसम्म उपचाररत उर्मिलालाई शुक्रबार बिहान डाक्टरले मृत घोषणा गरेका हुन्। शव पोष्टमार्टमका लागि मेची प्रादेशिक अस्पताल, भद्रपुर पठाइएको र त्यसपछि घर ल्याउने तयारी भइरहेको पारिवारिक स्रोतले जनाएको छ।
उर्मिला सवार प्र.१–०१–०१६ प ९२७० नम्बरको स्कुटर र भारतीय नम्बर प्लेट BR37AZ 6440 भएको मोटरसाइकल एक आपसमा ठोक्किँदा उनी गम्भीर घाइते भएकी थिइन्। उक्त दुर्घटनामा स्कुटर चालक उनका ६० वर्षीय ससुरा श्रीप्रसाद राजबंशी (कचनकवल गाउँपालिका–३) र भारतको किशनगञ्ज डिगलबैंकका सुरज टुडुको घटनास्थलमै मृत्यु भएको थियो।
दुर्घटनामा गम्भीर घाइते भएकी उर्मिलाका ७ वर्षीय छोरा आयुष राजबंशीको पनि सोही राति ९ बजे बीएण्डसी अस्पतालमै निधन भएको थियो। दुर्घटनाको भोलिपल्ट हजुरबुबा श्रीप्रसाद र नाती आयुषको एउटै चितामा अन्त्येष्टि गरिएको थियो।
