बुद्धशान्ति। झापाको बुद्धशान्ति गाउँपालिकाले फोहोरमैलाको व्यवस्थापनका लागि इन्सिनरेटरको व्यवस्था गर्दै झापाका पालिकाहरूमध्ये अग्रणी स्थान लिन सफल भएको छ। बुद्धशान्ति गाउँपालिकाले बुद्धशान्ति १ निवासी सुजित बरालको पाँच कठ्ठा जमिन २० वर्षका लागि लिजमा लिएर इन्सिनरेटरको निर्माण सम्पन्न गरेको छ।
राष्ट्रिय योजना आयोगबाट प्राप्त ९० लाख रुपैयाँको बजेटले निर्माण कार्य सम्पन्न भएको र आगामी वर्षका लागि ८५ लाख रुपैयाँको बजेट विनियोजन भइसकेको गाउँपालिका अध्यक्ष मनोज प्रसाईंले जानकारी दिएका छन्।
इन्सिनरेटरको प्रयोगले पालिका क्षेत्रमा जनघनत्व बढेसँगै फोहोर व्यवस्थापनमा ठोस योगदान पुर्याउने अपेक्षा गरिएको छ। प्रसाईंका अनुसार, “अब हामी स्रोतमै फोहोरको वर्गीकरणमा ध्यान दिनेछौं। कुहिने फोहोरबाट मल उत्पादन गरेर किसानलाई उपलब्ध गराउने योजना छ, जबकि नकुहिने सिसाबिनाको फोहोर इन्सिनरेटरमा जलाउने योजना बनाएका छौं।”
यसअघि, झापाको बिर्तामोडस्थित मनमोहन मेमोरियल सामुदायिक अस्पतालले पनि इन्सिनरेटर प्रयोगमा ल्याएको थियो, जुन वातावरणमैत्री प्रविधि भएको बताइन्छ।
भारतको सोलिडटेक वेस्ट एण्ड डिस्पोजल प्रालिद्वारा निर्मित इन्सिनरेटरले बिना इन्धन वा विद्युत फोहोर जलाउन सक्छ, जसले शून्य लागतमा फोहोरको व्यवस्थापन गर्न सकिने कम्पनीले दाबी गरेको छ।
यस प्रयासले बुद्धशान्ति गाउँपालिकालाई फोहोर व्यवस्थापनमा नयाँ युगको सुरुवात गर्नेमा विश्वास गरिएको छ।
