बुद्धशान्तिको टिमाईमा रहेको सब्जी मण्डी सञ्चालनमा

बुद्धशान्ति। झापाको बुद्धशान्ति गाउँपालिका-६ स्थित शान्तिनगर कृषि सहकारीले बुद्धशान्ति गाउँपालिकासँग दुई वर्षको लागि लिजमा लिएर सब्जी मण्डी सोमबारदेखि अनौपचारिक रूपमा संचालनमा ल्याएको छ।

सहकारीका उपाध्यक्ष तथा मण्डी संयोजक प्रदीप देव खतिवडा (सुजन) का अनुसार सोमबारदेखि नै स्थानीय क्षेत्रमा उत्पादन भएका अर्गानिक तरकारीको किनबेच सुरु भएको छ।

शान्तिनगर कृषि सहकारीका अनुसार टमाटर, सिमी, कोपि, भण्टा लगायतका तरकारी अब सहज रूपमा सर्वसुलभ मूल्यमा उपलब्ध हुनेछन्।
सहकारीका पदाधिकारी, सदस्य, स्थानीय किसान तथा व्यापारीहरूको उल्लेखनीय उपस्थितिमा संचालनमा आएको मण्डीमा चारआली लगायत विभिन्न स्थानबाट तरकारी व्यवसायीहरू सहभागी भएका थिए। मण्डीको औपचारिक उद्घाटन भने चैत्र १६ गते हुने सहकारीले जनाएको छ।