झापा। आफ्नै बुहारीमाथि आक्रमण गरेर पछि विष सेवन गरेका झापा कचनकवलका एक वृद्धको उपचारका क्रममा मृत्यु भएको छ।
कचनकवल गाउँपालिका–७ का ७८ वर्षीय प्रेमबहादुर सदेम्बाले गत मंगलवार राति ८:१५ बजे पुरानो पारिवारिक रिसिबीका कारण आफ्नी बुहारी ५२ वर्षीया सलानी सदेम्बामाथि तरकारी काट्ने चुलेसी प्रहार गरेका थिए। टाउकोमा गम्भीर चोट लागेकी सलानीलाई सुरुमा ओमसाई पाथीभरा अस्पताल, भद्रपुर लगिएको र त्यहाँबाट थप उपचारका लागि बीएण्डसी अस्पताल, बिर्तामोडमा भर्ना गरिएको थियो।
आक्रमणपछि फरार रहेका प्रेमबहादुर राति ११ बजे आफ्नै घरमा हार्पिक सेवन गरी अचेत अवस्थामा फेला परेका थिए। प्रारम्भिक उपचारपछि उनलाई प्रादेशिक अस्पताल, भद्रपुर लगिएको थियो। अवस्था गम्भीर भएपछि हिजो दिउँसो ओमसाई पाथीभरा अस्पतालको आइसीयुमा भर्ना गरिएको थियो। उपचारकै क्रममा आज बिहान ४ बजे उनको मृत्यु भएको जिल्ला प्रहरी कार्यालय झापाले जनाएको छ।
यस सम्बन्धमा थप अनुसन्धान भइरहेको प्रहरीले जनाएको छ।
