झापा। झापाको मेचीनगरमा मृत अवस्थामा भेटिएको वयस्क हात्तीलाई गोली हानेर मारेको डिभिजन बन कार्यालय झापाले पुष्टि गरेको छ ।
मेचीनगर नगरपालिका–११ स्थित कालिका सामुदायिक वनभित्र मंगलबार दिउँसो साढे ४ बजेको समयमा एउटा हात्ती मृत अवस्थामा फेला परेको थियो ।
अन्दाजी ४० वर्ष उमेरको वयस्क हात्तीको बुधबार दिउँसो पोस्टमार्टम गर्दा तीन राउन्ड गोली हानेर मारेको प्रमाणित भएको डिभिजन वन कार्यालय झापाका प्रमुख मेघराज राईले जानकारी दिए ।
उनका अनुसार हात्तीको कानको छेउमा गोली प्रहार भएको छ । हात्तीको अन्य भागमा गोली नछिर्ने भएकाले शिकारी समूहले कानको छेउबाट गोली प्रहार गरेर मारेर दाह्रा काटेर लगेको हुनसक्ने राईले बताए ।
झापामा अहिलसम्म यस्तो घटना भएको थिएन । हात्तीलाई गोली हानेर मारेपछि मेची चरा तथा वन्यजन्तु संरक्षण समाजले घटनाको घोर निन्दा गर्दै गहन अनुसन्धान गरेर दोषीमाथि कडा कारबाहीको माग गरेको छ ।
