सप्तकोशीमा पानीको बहाव बढ्दो, २८ ढोका खोलियो

धरान– लगातारको वर्षापछि सप्तकोशी नदीमा पानीको बहाव बढेको छ। 

सशस्त्र प्रहरी बल नेपाल नम्बर ४ हेडक्वार्टरका एसपी निर्मलकुमार थापाका अनुसार कोशी बराजमा पानीको बहाव प्रतिसेकेन्ड दुई लाख ४३० क्युसेक पुगेको छ।

बहाव बढेसँगै कोशी बराजका ५६ मध्ये अहिले २८ ढोका खोलिएका छन् । कोशी बराज हुँदै पानीको बहाव प्रतिसेकेन्ड एक लाख ५० हजार क्युसेक नाघेपछि खतराको संकेतस्वरूप रातो बत्ती बाल्ने गरिन्छ, सोहीअनुसार रातो बत्ती बालिएको कन्ट्रोल रुमले जनाएको छ।

हालसम्म पूर्वी तटबन्धमा कुनै क्षति नभएको एसपी थापाले जानकारी दिए। केही दिनदेखिको लगातार वर्षाका कारण जलसतह बढेको हो।