काठमाडौँ, असार २१ – नेपालले एसियन क्रिकेट काउन्सिल (एसीसी) १६ वर्षमुनिको इस्ट जोन कप क्रिकेटको उपाधि जितेको छ। शनिबार सम्पन्न फाइनल खेलमा सिङ्गापुरलाई २ विकेटले पराजित गर्दै नेपालले उपाधि आफ्नो नाममा गरेको हो।
फाइनल खेलमा उत्कृष्ट प्रदर्शन गरेका नेपालका अभय यादव फाइनलको ‘प्लेयर अफ द म्याच’ घोषित भए।
प्रतियोगितामा नेपालका ब्याटर रौनक श्रीवास्तव सर्वोत्कृष्ट खेलाडी (प्लेयर अफ द टुर्नामेन्ट) घोषित भए। उनले एक शतक र एक अर्धशतकसहित कुल २९६ रन बनाए। भूटानविरुद्ध उनले बनाएको १६८ रन ५० ओभरको क्रिकेटमा नेपाली खेलाडीले बनाएको सर्वाधिक व्यक्तिगत स्कोर हो। उनी प्रतियोगिताका उत्कृष्ट ब्याटर समेत बने।
यसैगरी, नेपालका प्रसिद्ध जैशीले पनि सानदार प्रदर्शन गर्दै १ शतक र १ अर्धशतकसहित २४६ रन जोडे।
बलिङतर्फ, नेपाली टोलीका कप्तान विपिनप्रसाद शर्मा प्रतियोगिताका सर्वोत्कृष्ट बलर बने। उनले कुल १७ विकेट लिए। त्यस्तै, शुभम् खनालले पनि १२ विकेट लिन सफल भए।
यस ऐतिहासिक जितसँगै नेपालले यु-१६ स्तरमा क्षेत्रीय क्रिकेटमा आफ्नो प्रभुत्व पुनः प्रमाणित गरेको छ।
