बुद्धशान्ति। झापाको बुद्धशान्ति गाउँपालिका–४ मा पर्ने बर्नेस्थित झापाबाट इलामतर्फ जाने सडकको दायाँबायाँ फुलेको गुलमोहरले दैनिक सयौँदेखि हजारौँसम्मको संख्यामा पर्यटकलाई आकर्षित गरिरहेको छ। चिया बगानको हरियालीबीच राताम्मे फूल फुलिरहेको दृश्यले यात्रु तथा घुम्न आउनेलाई सहजै मोहित पार्ने गरेको छ।
गुलमोहरसँग तस्बिर खिच्न र भिडियो बनाउनेको घुइँचो लाग्ने गरेको भए पनि त्यसको आधिकारिक तथ्याङ्क भने राखिएको छैन। गाउँपालिकाका अध्यक्ष मनोज प्रसाईँका अनुसार, पर्यटकको चाप बढेसँगै पालिकाले गत वर्ष त्यहाँ खानेपानी, शौचालय र विश्रामका लागि चौतारो निर्माण गरेको हो। त्यहाँ साना चिया पसल र होटल पनि क्रमशः सञ्चालनमा आउन थालेका छन्।
उक्त स्थान मेची राजमार्गअन्तर्गत पर्छ, जुन झापा र ताप्लेजुङलाई जोड्ने मुख्य सडक हो। हराभरा बर्ने चिया बगानबीच सजिएको गुलमोहरको लहर यात्रुहरूको लागि दृश्यात्मक सौन्दर्यको आकर्षण बनेको छ। विशेषगरी शनिबार र बिदाका दिनमा आगन्तुकहरूको संख्या झनै बढ्ने गरेको छ।
पर्यटन प्रवर्द्धनका लागि पालिकाले सडक छेउका दुई सयभन्दा बढी गुलमोहरका बिरुवाहरू रोप्नुका साथै झण्डै आधा किलोमिटर क्षेत्रमा ब्लक बिछ्याएर सडक विस्तारसमेत गरेको छ। त्यस क्षेत्रलाई पर्यटकहरूले ‘टिकटक रोड’ भनेर चिनाउन थालेका छन्।
इलामको प्रसिद्ध गन्तव्यहरू—कन्याम, श्रीअन्तु र माइपोखरीतर्फ यात्रा गर्ने अधिकांश मानिस गुलमोहरको रमणीयता देखेर त्यहाँ केही समय बिताउने गर्छन्। त्यस्तै, सो स्थानदेखि करिब एक किलोमिटर उत्तर बुद्धशान्ति–६ मा रहेको कोशी प्रदेशकै सबैभन्दा लामो झोलुङ्गे पुल हेर्न गएकाहरू पनि गुलमोहरको सौन्दर्यमा आकर्षित हुने गरेका छन्। यसले गर्दा सवारीसाधनहरूमा यात्रुको चाप उल्लेख्य रूपमा बढेको देखिन्छ।
