नेपाल स्काउटले आफ्नो स्थापना कालदेखि ७५ वर्षको यात्रा तय गरिरहेको यस ऐतिहासिक अवसरमा हामी सबै स्काउट सदस्य, स्वयंसेवक तथा शुभेच्छुकहरूका लागि यो गर्वको विषय हो। सात दशकभन्दा लामो यात्रामा नेपाल स्काउटले राष्ट्र निर्माण, युवा विकास, नेतृत्व क्षमता अभिवृद्धि, सामाजिक सेवा तथा विपद् व्यवस्थापनका क्षेत्रमा महत्वपूर्ण योगदान पुर्याएको छ।
तर, ७५ वर्षको उत्सव मनाइरहँदा हामीले आफूलाई केही गम्भीर प्रश्नहरू पनि सोध्न आवश्यक छ। के हामीले यो अवधिमा संस्थाको उद्देश्य र मर्मअनुसार अपेक्षित उपलब्धि हासिल गर्न सकेका छौं? संस्थाको वर्तमान अवस्था कस्तो छ? के संगठनभित्र देखिएका समस्या, विकृति, विसंगति तथा व्यक्तिवादले संस्थालाई कमजोर बनाइरहेको छैन?
हामीले स्वीकार गर्नुपर्छ कि कुनै पनि संस्था केवल वार्षिकोत्सव मनाएर मात्र महान बन्दैन। संस्थाको वास्तविक शक्ति यसको सुशासन, पारदर्शिता, उत्तरदायित्व, अनुशासन र समर्पित नेतृत्वमा निहित हुन्छ। यदि संगठनभित्र व्यक्तिवाद हाबी हुन्छ, संस्थागत प्रणाली कमजोर बनाइन्छ र साझा उद्देश्यभन्दा व्यक्तिगत स्वार्थलाई प्राथमिकता दिइन्छ भने त्यसले संस्थाको भविष्यलाई नै प्रभावित गर्छ।
७५ वर्षको यो अवसर केवल उत्सवको क्षण मात्र होइन, आत्ममूल्याङ्कन र सुधारको अवसर पनि हो। अब समय आएको छ कि हामी सबैले संस्थालाई पछाडि पार्ने प्रवृत्ति, अनावश्यक विवाद र व्यक्तिगत स्वार्थभन्दा माथि उठेर स्काउटको मूल मूल्य र सिद्धान्तलाई केन्द्रमा राखौं। संगठनलाई अझ सुदृढ, प्रभावकारी र भविष्यमुखी बनाउन सक्षम, दूरदर्शी र संस्थाप्रति प्रतिबद्ध नेतृत्व चयन गर्नु आजको आवश्यकता हो।
यद्यपि, यी चुनौतीहरूको बीचमा पनि सकारात्मक ऊर्जा, समर्पण र सेवाभावका साथ स्काउट अभियानलाई अगाडि बढाइरहेका हजारौं स्काउट सदस्यहरू प्रशंसाका पात्र छन्। उनीहरूको अथक प्रयासले नै संस्थाप्रति आशा र विश्वास कायम राखेको छ।
नेपाल स्काउटको ७५ वर्षे यात्राको यस महत्वपूर्ण घडीमा सम्पूर्ण स्काउट परिवारलाई हार्दिक शुभकामना व्यक्त गर्दै, आगामी दिनमा संस्थाको गरिमा, प्रतिष्ठा र उद्देश्यलाई अझ उचाइमा पुर्याउने नेतृत्व चयन गर्न तथा संगठनलाई सही दिशामा अगाडि बढाउने जिम्मेवारी सफलतापूर्वक निर्वाह गर्न सबैमा शुभेच्छा व्यक्त गर्दछु।
“व्यक्तिभन्दा संस्था ठूलो हुन्छ, र संस्थाभन्दा ठूलो यसको उद्देश्य।”
आउनुहोस्, ७५ वर्षको इतिहासलाई केवल उत्सवमा सीमित नराखी आगामी पुस्ताका लागि अझ सबल, सक्षम र गौरवशाली नेपाल स्काउट निर्माण गर्ने संकल्प गरौं।
लेखक : स्काउटर पवन कोइराला, ललितपुर महानगर स्थानीय स्काउट प्रमुख आयुक्त
