गृहमन्त्रीको पदभार सम्हालेकै दोश्रो दिन रवि लामिछानेले विशिष्ट व्यक्तिहरुलाई कार्यविधि व्यवस्था विपरित सेवा सुविधा फिर्ता गराउने निर्णय गरेका छन् । गृहमन्त्रालयले कार्यविधिमा व्यवस्था गरिएको भन्दा विपरीत भीआईपीको सेवा सुविधा लगायत व्यक्तिगत सुरक्षाकर्मी, सहयोगी राखेको खण्डमा ४८ घण्टाभित्र फिर्ता गर्न निर्देशन दिएको छ ।
मंगलबार एक विज्ञप्ती जारी गर्दै गृह मन्त्रालयका सहसचिव तथा प्रवक्ता फणिन्द्रमणि पोखरेलले सरकारबाट विशिष्ट व्यक्तिको सुरक्षा व्यवस्थापन कार्यविधि, २०७७ मा व्यवस्था गरिएको भन्दा विपरीत सेवा सुविधालगायत व्यक्तिगत सुरक्षाकर्मी, सहयोगी राखेको भए ४८ घण्टाभित्र फिर्ता गर्न मातहत सुरक्षा निकायलाई निर्देशन गरिएको बताएका छन् ।
विशिष्ट व्यक्तिहरुको सुरक्षा व्यवस्थापनलाई थप प्रभावकारी, व्यवस्थित र परिणाममुखी बनाउनकालागि विशिष्ट व्यक्तिहरुको सुरक्षा र सम्मानलाई ध्यान दिँदै नेपाल सरकारले विशिष्ट व्यक्तिहरुको सुरक्षा व्यवस्थापन कार्यविधि, २०७७ जारी भएर हाल कार्यान्वयन गरेको पनि उक्त विज्ञप्तीमा उल्लेख गरिएको छ ।
