झापामा एनएमसी डेरीको गाडीले ठक्कर दिंदा एक जनाको मृत्यु, दुई घाइते

झापा। झापाको माईधारमा आज बिहान एनएमसी डेरीको गाडीले स्कुटरलाई ठक्कर दिँदा एकजनाको मृत्यु भएको छ ।

दुर्घटनामा दुईजना गम्भीर घाइते भएका छन् । पूर्वपश्चिम राजमार्गअन्तर्गत माईधारमा भएको दुर्घटनामा स्कुटरमा सवार तीनजना गम्भीर घाइते भएका थिए ।

एकजनाको बिर्तामोडस्थित बिएन्डसी अस्पतालमा उपचारको क्रममा मृत्यु भएको जिल्ला ट्राफिक प्रहरी कार्यालय झापाले जनाएको छ । तीनैजना पुरुष रहेको बताइएको छ । हालसम्म कसैको परिचय खुल्न सकेको छैन ।

पश्चिमबाट पूर्वतर्फ आउँदै गरेको प्रदेश १–०१-०१६ प ४२८८ नम्बरको स्कुटर र पश्चिमतर्फ जाँदै गरेको मेचीनगरस्थित एनएमसी डेरीको मे. १ च ५८६८ सवारी साधन एकआपसमा ठक्कर खाँदा स्कुटरमा सवार तीनजना घाइते भएका थिए ।

उनीहरू कसैको परिचय खुल्न नसकेको ट्राफिक प्रहरीले जनाएको छ । दुर्घटना आज बिहान ३ बजेको समयमा भएको हो ।