पालिका सन्देश । आदर्श माध्यमिक विद्यालय बुद्धशान्ति २ जयपुर झापामा मैत्रीपूर्ण क्रिकेट प्रतियोगिता सम्पन्न भएको छ । आदर्श मावि जयपुर र कर्णाली एजुकेशन फाउण्डेशन बुद्धशान्ति -१ बिच मैत्रीपूर्ण क्रिकेट भएको हो ।
१२।१२ ओभरको खेलमा आदर्श मावि जयपुर १० विकेटले विजयी भएको छ । टस जितेर व्याटिङ राजेको कर्णाली एजुकेशन फाउण्डेशनले १०।५ ओभरमा सबै विकेट गुमाउँदै ६१ रन बनाएको थियो । कर्णलीका लागि राजन घिमिरेले १२ रनको योगदान दिएका थिए । उक्त खेलमा आदर्श माविका दिपेश ढुंगेलले २ ओभरमा ८ रन दिँदै सर्वाधिक २ विकेट लिएका थिए ।
६२ रनको लक्ष्य पछ्याएको आदर्श मावि जयपुरले ४.४ ओभरमा खेल्दै सो लक्ष्य सहज रुपमा भेटेको हो । आदर्श माविका लागि अनुग्रह लम्सालले सर्वाधिक २८ रन जोडेका थिए भने अर्का खेलाडी सन्देश गड्तौलाले १४ रन बनाएका थिए ।
उक्त खेलमा दुवै टिमका सहभागी खेलाडीहरुलाई स्थानीय खेलप्रेमी समाजसेवी व्यक्तित्व नविन पोखरेलले पुरस्कार प्रदान गरेका थिए । खेल संयोजक हरि पोखरेलले खेलाडीको प्रतिभा प्रस्फुटन तथा नयाँ खेलाडीलाई उत्साह प्रदान गर्न खेलको आयोजना गरिएको बताएका छन् । उनले आगामी दिनमा यस्ता किसिमका कार्यक्रम गर्दै लैजाने समेत बताए ।
उक्त खेलमा स्थानीय क्रिकेट खेलाडी उद्वव ओली मुख्य अम्पायरको भूमिकामा रहेका थिए भने सहायक अम्पायरका रुपमा शिक्षक अरुण ढुंगेल थिए । अफिसियलको रुपमा शिक्षक प्रेम पोखरेल, सागर तिमिसना र प्रेम श्रेष्ठले भूमिका निर्वाह गरेको उक्त खेलको संयोजक शिक्षक हरि पोखरेलले बताएका छन् ।
