मनिष बराल
कचनकवल। कचनकवल विद्या मन्दिर माध्यमिक विद्यालयद्वारा आयोजित प्रथम कचनकवल गाउँपालिका स्तरिय अन्तर मा.वि क्रिकेट प्रतियोगिता पथरिया मा.वि को खेलमैदानमा आजबाट औपचारिक रुपमा सुरु भएको छ ।
खेलमा विद्या निकेतन सेकेन्डरी स्कुल, श्री स्वर्णिम शिक्षा सदन, श्री लक्ष्मी प्रसाद देवकोटा मा.वि, कचनकवल विद्या मन्दिर मा.वि, श्री महेन्द्र रत्न मा.वि गरी जम्मा ५वटा विद्यालयले सहभागिता जनाएको थियो ।
कचनकवलका प्रतिभाहरूको पहिचान गर्न तथा खेलाडीलाई थप हौसला दिई यस क्षेत्रमा आफ्नो उचाई कायम राख्न प्रतियोगिता आयोजना गरिएको आयोजकले जनाएको छ।
प्रतियोगिताको पहिलो खेल विद्या निकेतन सेकेन्डरी स्कुल र श्री लक्ष्मी प्रसाद देवकोटा मा.वि बीच सञ्चालन भएको थियो । जसमा, विद्या निकेतन सेकेन्डरी स्कुलले ८ विकेटको फराकिलो जित हाँसिल गरेको थियो ।
त्यस्तै, प्रतियोगिताको दोस्रो खेल श्री महेन्द्र रत्न मा.वि र श्री स्वर्णिम शिक्षा सदन बीच भएको थियो । जसमा, श्री महेन्द्र रत्न मा.वि ले श्री स्वर्णिम शिक्षा सदनलाई ९५ रनको भारी अन्तरले हराएको थियो ।
पहिलो खेलमा जित हाँसिल गरेको विद्या निकेतन सेकेन्डरी स्कुल र दोश्रो खेलमा जित हाँसिल गर्ने श्री महेन्द्र रत्न मा.वि तथा आयोजक टीम बीच लक्की ड्र गर्दा विद्या निकेतन सेकेन्डरी स्कुलले लक्की ड्र जितेर सिधै फाइनल खेलमा प्रवेश गरेको हो ।
श्री महेन्द्र रत्न मा.वि र कचनकवल विद्या मन्दिर बीच भएको दोस्रो सेमी फाइनल खेलमा श्री महेन्द्र रत्न मा.विलाई ६ विकेटले हराउदै आयोजक टीम फाइनल खेलमा प्रवेश गरेको हो ।
सिधै फाइनल खेलमा प्रवेश गरेको विद्या निकेतन सेकेन्डरी स्कुल र दोस्रो सेमीफाइनल खेलको विजेता बन्न सफल कचनकवल विद्या मन्दिर बीचको फाइनल खेल भने भोलि मात्र हुने आयोजकले जनाएको छ ।
