बिर्तामोड – बिर्तामोड नगरपालिकामा देखिएको अनियमितता, भ्रष्टाचार तथा विकृतिविरुद्ध राष्ट्रिय प्रजातन्त्र पार्टी (राप्रपा) बिर्तामोड नगर समितिले आइतबार नगरपालिका कार्यालयमा ज्ञापनपत्र बुझाएको छ।
राप्रपा बिर्तामोड नगर अध्यक्ष लक्ष्मी गौतमको नेतृत्वमा कार्यवाहक मेयर नगेन्द्रप्रसाद संग्रौलालाई २८ बुँदे ज्ञापनपत्र हस्तान्तरण गरिएको हो। ज्ञापनपत्रमा नगरपालिकाभित्र भएका आर्थिक अनियमितता, सार्वजनिक जग्गा अतिक्रमण, शिक्षाक्षेत्रमा देखिएका समस्या, विकास निर्माणका काममा भएको ढिलाइ तथा पारदर्शिताको अभाव जस्ता विषयलाई प्रमुख रूपमा उठाइएको छ।
ज्ञापनपत्रमा बिर्तामोड क्षेत्रका सरकारी जग्गा भूमाफियाले अतिक्रमण गरेको उल्लेख गर्दै तिनको संरक्षणका लागि स्थानीय सरकारलाई आग्रह गरिएको छ। त्यस्तै, नगरपालिका क्षेत्रभित्र सुचिकृत मजदुरहरूलाई प्रदान गरिने सेवा-सुविधा प्रभावकारी रूपमा कार्यान्वयन हुनुपर्ने माग गरिएको छ।
राप्रपाले बिर्तामोड नगरपालिकामा निर्माणाधीन संरचनामा आर्थिक अनियमितता भएको आशंका व्यक्त गर्दै निष्पक्ष छानबिन गर्न माग गरेको छ। बिर्तामोड वार्ड नं. ९ मा ६५ लाख रुपैयाँ लागतमा निर्माण गरिएको खानेपानी टंकीको अवस्था जीर्ण रहेको भन्दै उक्त रकमको हिसाब-किताब सार्वजनिक गर्न आग्रह गरिएको छ।
विद्यालय व्यवस्थापन समितिको गठन प्रक्रियामा पारदर्शिता नभएको भन्दै राप्रपाले कानुनी प्रक्रिया अनुरूप नयाँ समिति गठन गर्न माग गरेको छ। साथै, सामुदायिक विद्यालयहरूमा शुल्क लिने प्रथालाई बन्द गर्नुपर्ने, निजी विद्यालयहरूले दिनुपर्ने १० प्रतिशत छात्रवृत्तिलाई प्रभावकारी बनाउन आवश्यक अनुगमन गर्नुपर्ने माग गरिएको छ।
ज्ञापनपत्रमा बिर्तामोड क्षेत्रमा सहकारी तथा वित्तीय संस्थामार्फत धेरै बचतकर्ताहरू ठगिएको उल्लेख गर्दै ठोस कदम चाल्न माग गरिएको छ। नगरपालिकाको योजनासँग सम्बन्धित बजेट विनियोजन, उपभोक्ता समिति गठन तथा विकास आयोजनामा पारदर्शिता ल्याउन सर्वदलीय समन्वय आवश्यक रहेको बताइएको छ।
बिर्तामोड नगरपालिकाका योजनाहरू अनुगमन समितिले केवल कागजी रूपमा अनुगमन गर्ने प्रवृत्ति रहेको भन्दै राप्रपाले नियमित अनुगमनको माग गरेको छ। नगरपालिकाको लेखा परीक्षकको प्रतिवेदनमा अत्यधिक बेरुजु देखिएको भन्दै यसको विवरण सार्वजनिक गर्न आग्रह गरिएको छ।
सार्वजनिक जग्गा व्यवस्थापन, नगरपालिकाका कर्मचारीहरूको नियुक्ति प्रक्रिया, विकास निर्माणमा देखिएको लापरबाही, तथा लागू औषध नियन्त्रणमा स्थानीय सरकारको भूमिकाबारे स्पष्टता दिनुपर्ने माग राखिएको छ।
राप्रपाले आफ्ना मागहरू बेवास्ता गरिए कडा आन्दोलन गर्ने चेतावनी पनि दिएको छ। “यदि तत्काल समस्या समाधानका लागि कदम चालिएन भने हाम्रो पार्टी सडक आन्दोलन गर्न बाध्य हुनेछ,” ज्ञापनपत्रमा उल्लेख छ।
