काठमाडौं । काठमाडौं महानगरपालिकाका मेयर बालेन्द्र साह (बालेन) ले प्रमुख प्रशासकीय अधिकृत नपठाएको भन्दै एक साता भित्र पठाउन अल्टिमेटम दिएका थिए । तर, अल्टिमेटम दिएको नवौँ दिनसम्म पनि संघीय सरकारले प्रमुख प्रशासकीय अधिकृत पठाएको छैन, जसका कारण महानगरको प्रशासनिक गतिविधि ठप्पप्रायः बनेको छ ।
मेयर साहले चैत ११ गते सामाजिक सञ्जालमार्फत सरकारको ढिलासुस्तीका कारण प्रमुख प्रशासकीय अधिकृत नआएको बताएका थिए । साथै, महानगरका कर्मचारीहरूले महिनौँदेखि तलब नपाएको उल्लेख गर्दै, एक हप्ताभित्र समस्या समाधान नभए ‘सबैलाई टुकुचामा गाड्ने’ चेतावनी दिएका थिए ।
महानगर स्रोतका अनुसार संघीय मामिला तथा सामान्य प्रशासन मन्त्रालयलाई प्रमुख प्रशासकीय अधिकृत माग गर्दै पत्र पठाइएको छ । मन्त्रालयले पहिले बिदामा गएका प्रमुख प्रशासकीय अधिकृतको अवस्थाबारे स्पष्टीकरण मागेपछि त्यसको विस्तृत जवाफ समेत पठाइएको छ । तर, मन्त्रालयले अहिलेसम्म नयाँ प्रमुख प्रशासकीय अधिकृत पठाउने निर्णय गरेको छैन ।
संघीय मामिला तथा सामान्य प्रशासन मन्त्रालयका अनुसार महानगरका प्रमुख प्रशासकीय अधिकृत बिदामा रहेकाले तत्काल नयाँ पठाउन कठिन भएको बताइएको छ ।
महानगरमा प्रमुख प्रशासकीय अधिकृत नहुँदा आर्थिक कारोबार ठप्प भएको छ । कानुनी व्यवस्थाअनुसार आर्थिक अधिकार प्रमुख प्रशासकीय अधिकृतसँग मात्र रहने भएकाले तलब भुक्तानीलगायतका प्रक्रिया रोकिएका छन् ।
यसले करिब चार हजार कर्मचारी, सरकारी विद्यालयका शिक्षक, सरसफाइ कर्मचारी तथा श्रम बैंकका श्रमिकहरू तलबविहीन बन्न पुगेका छन् । ठेकेदार भुक्तानी, भौतिक पूर्वाधार निर्माण तथा सडक मर्मतजस्ता कार्यहरू समेत प्रभावित भएका छन् ।
पुरानो बसपार्कस्थित काठमाडौं टावरको नक्सा विवादपछि मेयर बालेन साहले छानबिन समिति गठन गरेसँगै तत्कालीन प्रमुख प्रशासकीय अधिकृत सरोज गुरागाईं बिदामा बसेका थिए । त्यसपछि निमित्त प्रमुख प्रशासकीय अधिकृतको जिम्मेवारी सम्हालेका गोविन्दप्रसाद शर्माले समेत मेयर बालेन थाइल्यान्ड भ्रमणमा रहेका बेला राजीनामा दिएपछि महानगर प्रशासनिक नेतृत्वविहीन बनेको हो ।
