झापा — सामुदायिक वन उपभोक्ता महासंघ झापाको २१औं परिषद् सभा विभिन्न कार्यक्रमका साथ सम्पन्न भएको छ।
महासंघका जिल्ला अध्यक्ष बेदप्रकास भण्डारीको अध्यक्षतामा सम्पन्न कार्यक्रममा प्रमुख अतिथिका रूपमा महासंघका राष्ट्रिय कार्यसमिति सदस्य तथा झापा इन्चार्ज रोहिणी प्रसाद गौतम उपस्थित थिए।
कार्यक्रममा जिल्ला वन कार्यालय झापाका वन अधिकृत जीवन पाठक, महासंघका प्रदेश सदस्य ख्याम सिटौला, न्यायिक समिति सदस्य घनश्याम खनाल, मेचीनगर नगर महासंघकी अध्यक्ष जानुका ओली, अर्जुनधारा महासंघका अध्यक्ष भानु श्रेष्ठ, पत्रकार अमित खम्बुलगायतको आतिथ्यता रहेको थियो।
कार्यक्रममा विभिन्न विधामा पुरस्कार तथा सम्मान वितरण गरिएको थियो। चन्द्रमान राई स्मृति पुरस्कारबाट वन अधिकृत जीवन पाठक र पत्रकार अमित खम्बुलाई नगद ७ हजार रुपैयाँसहित कदरपत्रद्वारा सम्मान गरिएको थियो।
त्यस्तै, उत्कृष्ट सामुदायिक वनको रुपमा ‘भेलागुडी’ र ‘मागुरमाडी विट नं. २’ लाई सम्मान प्रदान गरिएको थियो। उत्कृष्ट वन अध्यक्षको रुपमा दुर्गाभिट्टाका धनराज गुरूङ र कन्काई सामुदायिक वन उपभोक्ता समूहका ख्याम ओलीलाई दोसल्ला र कदरपत्रद्वारा सम्मान गरिएको थियो। उत्कृष्ट जिल्ला सदस्यको रूपमा श्यामराजा पुरी पनि कदरपत्रले सम्मानित भए।
अध्यक्ष बेदप्रकास भण्डारीले परिषद्मा अध्यक्षीय प्रतिवेदन प्रस्तुत गरेका थिए भने कोषाध्यक्ष देवीका अधिकारीले ४७ लाख ८० हजार ६ सय ९५ रुपैयाँको आर्थिक प्रतिवेदन पेश गरेकी थिइन्।
कार्यक्रममा उपाध्यक्ष चन्द्र तामाङले स्वागत मन्तव्य राखेका थिए भने सचिव खिम आङवोले सञ्चालन गरेका थिए।
