भद्रपुर नगरपालिका–५ निवासी अन्दाजी २० वर्षीय शंकर राजवंशीलाई एक किशोरीमाथि जबरजस्ती करणी गरी गर्भ बोकाएको आरोपमा प्रहरीले पक्राउ गरेको छ।
राजवंशीले करिब आठ महिना अघि, २०८१ साल असोज २४ गते बिहान ४:३० बजेदेखि राति ९ बजेसम्मको समयमा भद्रपुरस्थित डेग्लो होटलमा १७ वर्षीया किशोरीलाई करणी गरेको आरोप छ। उजुरीमा उल्लेखअनुसार, उनीहरू होटलको कोठामा प्रवेश गरी निश्चित रकम तिरेर बसेका थिए।
प्रहरीका अनुसार, राजवंशी हाल कनकाई नगरपालिका–८, लक्ष्मीपुरमा लुकेर बसेको अवस्थामा फेला परेका हुन्। उनलाई जिल्ला प्रहरी कार्यालय झापाबाट खटिएको टोलीले पक्राउ गरेको हो।
किशोरीको स्वास्थ्य अवस्था कमजोर भएपछि उनलाई स्थानीयको सहयोगमा भद्रपुर नगर प्रहरीले बिहीबार साँझ उद्धार गरी प्रादेशिक अस्पताल, भद्रपुरमा भर्ना गरेको छ। शारीरिक अवस्था गम्भीर भएपछि उपचारका लागि तत्काल अस्पताल लगिएको हो।
पीडितका बुवाले जिल्ला प्रहरी कार्यालय झापामा जाहेरी दिएपछि राजवंशीलाई पक्राउ गरिएको प्रहरीले जानकारी दिएको छ। हाल उनी प्रहरी नियन्त्रणमा छन् र घटनासम्बन्धी थप अनुसन्धान जारी छ।
