काठमाडौं — देशभर मनसुनी वायुको प्रभाव सक्रिय रहेका कारण आज राति र भोलि देशका धेरै स्थानमा बदली र वर्षाको सम्भावना रहेको मौसम पूर्वानुमान महाशाखाले जनाएको छ।
आज राति देशभर आंशिकदेखि सामान्य बदली रहनेछ। कोशी, बागमती, गण्डकी, लुम्बिनी र सुदूरपश्चिम प्रदेशका एक–दुई स्थानमा मेघगर्जन र चट्याङसहित भारी वर्षा हुन सक्ने सम्भावना रहेको महाशाखाले जनाएको छ।
यस्तै, देशको पहाडी भू-भागका केही स्थानहरूमा तथा बाँकी भू-भागका थोरै स्थानहरूमा हल्कादेखि मध्यम खालको वर्षा हुन सक्ने पूर्वानुमान गरिएको छ। साथै उच्च–पहाडी तथा हिमाली भू-भागका थोरै स्थानमा हल्का वर्षा वा हिमपात पनि हुन सक्ने सम्भावना रहेको छ।
भोलि दिउँसो पनि यही अवस्था जारी रहनेछ। देशभर आंशिकदेखि सामान्य बदली रहनेछ भने पहाडी भू-भागका केही स्थानहरूमा र बाँकी भू-भागका थोरै स्थानहरूमा मेघगर्जन/चट्याङसहित हल्कादेखि मध्यम वर्षाको सम्भावना रहन्छ। भारी वर्षा हुने सम्भावना भने आज रातिसँगै भोलि पनि कोशी, बागमती, गण्डकी, लुम्बिनी र सुदूरपश्चिम प्रदेशका एक–दुई स्थानमा रहनेछ।
मौसमविद्हरूले भारी वर्षाका कारण पहिरो, बाढी र जलमग्नता जस्ता सम्भावित जोखिमप्रति सतर्कता अपनाउन आग्रह गरेका छन्।
महाशाखाका अनुसार, हाल देशभर मनसुनी वायुको सक्रिय प्रभाव रहेकोले यो प्रणालीबाट उत्पन्न प्रभावहरू अझै केही दिनसम्म जारी रहन सक्ने संकेत देखिएको छ।
