तनहुँ। जिल्लामा किसान चैते धानखेती भित्र्याउने चटारोमा छन्। दुई समयमा धानखेती नहुने स्थानमा बर्खे धान लगाउने कार्य सुरु भइसकेको छ। तनहुँका धेरै फाँटमा धानखेती गरिन्छ।
जिल्लाका धेरै पालिकामा धानखेती हुन्छ। जिल्लाका सिञ्चित क्षेत्रमा धानखेती गरिन्छ। व्यास, भानु, भिमाद, शुक्लागण्डकी नगरपालिका, म्याग्दे, आँबुखैरेनी, देवघाट, बन्दीपुर, ऋषिङ र घिरिङ गाउँपालिकामा धानखेती गरिन्छ। भानु, व्यास, म्याग्दे, आँबुखैरेनीका धेरै फाँटमा चैते धानखेती हुने गरेको छ।
कृषि ज्ञान केन्द्रका सूचना अधिकारी र बाली संरक्षण अधिकृत किरण परियारले भने, जिल्लाका नौ हजार ४६४ हेक्टरमा धानखेती हुने भए पनि एक हजार ८०२ हेक्टरमा चैते धानखेती हुँदै आएको छ। मनसुन सुरु भएसँगै चैते धानखेती थन्क्याउन किसान व्यस्त छन्। चैते धान थन्क्याएपछि असारे धान (बर्खे धान) रोप्ने चटारो हुन्छ। जिल्लाका चैते धानखेती हुने फाँटमा लगाइएका धान थन्क्याउन भ्याइ-नभ्याइ छ।
मनसुन सुरु भएपछि बर्खे धानमात्र हुने स्थानमा अहिले रोपाइँ सुरु भइसकेको अधिकृत परियारले बताए। तनहुँ धानखेती हुने पहाडी जिल्लाकै रूपमा पर्ने गरेको उनको भनाइ छ। उक्त क्षेत्रफलमा गरिएको धानखेतीबाट आर्थिक वर्ष २०८०/८१ मा ३७ हजार ९४२ मेट्रिक टन धान उत्पादन भएको छ। त्यसमध्ये आठ हजार ७०४ मेट्रिक टन चैते धान उत्पादन भएको छ।
चैते धान पवर्द्धन कार्यक्रमले यसतर्फ किसान आकर्षित भएको अधिकृत परियारले बताए। थन्क्याउने कार्य चलिरहेकाले चालु आवको तथ्याङ्क आउन बाँकी छ। उनले भने, ‘सिँचाइ भएको क्षेत्र र केही क्षेत्रमा सिँचाइको व्यवस्था भएकाले उत्पादन बढ्ने आशा गरिएको छ।’
भानुको चुँदी, खहरे, सतीघाट फाँट, व्यासको घाँसीकुवा, साँगे, कलेस्ती, माझ, गजौडे, सिसाघाट फाँट, म्याग्देको गुणादी, थर्पु, पसले, सेरा फाँट, शुक्लागण्डकीको ढोरफिर्दी फाँट, भिमादको बुडुवा फाँटलगायत विभिन्न पालिकाका फाँटमा धानखेती हुने गरेको छ। चैते धान विशेषगरी चिउरा उत्पादनका लागि उपयोगी हुने गरेको ज्ञान केन्द्रले जनाएको छ। रासस
