दसैँमा खसीबोका अनलाइनबाटै बुकिङ गर्न सकिने

काठमाडौं। खाद्य व्यवस्था तथा व्यापार कम्पनीले दसैँमा खसीबोका तथा च्यांग्रा अनलाइनबाटै बुकिङ गर्न सकिने व्यवस्था गर्न लागेको छ । खाद्य व्यवस्था तथा व्यापार कम्पनी खरिद विभाग प्रमुख अनन्तराज पौडेलले यसै दसैँलाई लक्षित गरेर बुकिङ प्रणाली बनाइरहेको जानकारी दिए ।

प्रणाली बनेपछि दसैँमा अनलाइनबाटै खसीबोका तथा च्यांग्रा बुकिङ गर्न सकिनेछ । ‘हामीले दसैँमा खसीबोका र च्यांग्रा अनलाइनबाट नै अर्डर गर्न सकिने व्यवस्था गर्न लागेका छौँ । हेरौँ कति सम्भव हुन्छ,’ उनले भने । तर, केही प्रतिशत रकम बुकिङकै क्रममा बुझाउनुपर्नेछ ।

‘अनलाइनबाट बुकिङ गर्दा उपभोक्ताले केही प्रतिशत रकम बुझाउनुपर्नेछ । तर, यो प्रणाली पूर्णरूपमा सञ्चालनमा भने आएको छैन,’ उनले भने । खाद्य व्यवस्था तथा व्यापार कम्पनीले दसैँलक्षित सहुलियत पसल भदौ ३० गतेदेखि सञ्चालन गर्ने तयारी गरेको छ ।