काठमाडौँ ।
इन्डियन प्रिमियर लिग (आईपीएल) २०२५ अन्तर्गत बहुप्रतीक्षित बैङ्गलोर र कोलकाताबीचको खेल वर्षाका कारण बिना एक बल पनि नखेली रद्द भएपछि डिफेन्डिङ च्याम्पियन कोलकाताको प्लेअफ यात्रा यहीँ टुंगिएको छ ।
खेल रद्द भएपछि दुवै टोलीले १-१ अंक बाँडेका छन् । तर, अंक तालिकामा कमजोर प्रदर्शन गरिरहेको केकेआरका लागि त्यो अंक पर्याप्त बन्न सकेन । अब कोलकाताको प्लेअफ प्रवेशको सम्भावना समाप्त भएको छ ।
कोलकाताका लागि यो खेल जित्नैपर्ने थियो, जसले मात्र प्लेअफको ढोका खुला राख्थ्यो । तर, वर्षाले उनीहरूलाई अप्रत्याशित रूपमा प्रतियोगिताबाट बाहिर पु-याइदिएको छ, जसले टोली र समर्थकहरू दुवैलाई निराश बनाएको छ ।
उता, रोयल च्यालेन्जर्स बैङ्गलोर (आरसीबी) का लागि भने प्लेअफको ढोका अझै खुला नै छ । बाँकी रहेका खेलहरूमा जित हासिल गर्न सकेमा आरसीबी शीर्ष चारमा स्थान बनाउन सक्छ ।
धेरैले सामाजिक सञ्जालमार्फत यस्तो महत्वपूर्ण खेलको लागि ‘रिजर्भ डे’ (वैकल्पिक मिति) नतोकिनु आपत्तिजनक रहेको प्रतिक्रिया दिएका छन् । वर्षा पूर्वानुमान थाहा हुँदाहुँदै पनि प्रतिस्पर्धा सुरक्षित गर्ने पर्याप्त तयारी नभएको भन्दै आयोजकको आलोचना गरिएको छ ।
