काठमाडौं। वैदेशिक रोजगारीबाट फर्किँदा अवैधरुपमा ल्याएको सुन सम्बद्ध धनीलाई नदिन अपहरणमा परेको नाटक गरेको आरोपमा प्रहरीले एक जनालाई पक्राउ गरेको छ ।
पक्राउ पर्नेमा झापाको बिर्तामोड–५ बस्ने इलामको सूर्योदय–१४ का ३८ वर्षीय सूर्यबहादुर समाल मगर छन् । बुधबार बिहान ललितपुरको गोदावरी–६ सडक किनारमा एक जना घाइते लडिरहेको खबर प्रहरीले पाएको थियो ।
सामान्य चोटपटक लागेको अवस्थामा भेटिएका उनलाई प्रहरीले प्राथमिक उपचारका लागि गोदावरी–६ को नमस्ते मेट्रो अस्पताल पुर्याएको थियो । उनी बोल्नसक्ने अवस्थामा थिए । उनको कुरा गराइमा प्रहरीलाई शंका लाग्यो । अनुसन्धान गर्दै जाँदा अपहरणको नाटक गरेको खुलेको प्रहरीले जनाएको छ ।
प्रहरीका अनुसार गत मंगलबार बिहान कतारबाट फर्किएका मगरले साथमा औंठी र ब्रासलेट गरि ७० ग्राम सुन ल्याएका थिए । जो उनले अरु कसैको भरिया भएर काठमाडौं उत्रिएपछि दिनुपर्ने थियो । राजस्व छली गरी ल्याएको सुनसँगै उनको साथमा एउटा लेनोभोको ल्यापटप सामसङ कम्पनीको एक मोबाइल सेट र एउटा आइफोन थियो ।
त्रिभुवन अन्तर्राष्ट्रिय विमानस्थलमा अवतरण लगत्तै उनी सोही दिन १ बजेको सूर्य एयरलाइन्सको विमानमा झापाको भद्रपुर पुगे । सुन, ल्यापटप र मोबाइल सेट बिर्तामोड–५ स्थित घरमा लगेर लुकाए । साँझ साढे ६ बजेको बुद्ध एयरको विमानमा काठमाडौं फर्किए । आफूले आफैंलाई चोटपटक लगाइ गोदावरी–६ को नालामा गइ पल्टिएको अनुसन्धानबाट खुलेको प्रहरीले बिहीबार जनाएको हो ।
शंका लागेपछि प्रहरीले इलाका प्रहरी कार्यालय बिर्तामोडको समन्वयमा उनको घर कोठाको खानतलासी गराएको थियो । मगरले कतारबाट भन्सार छली ल्याएको सुन बरामद भएपछि घटनाको वास्तविकता खुलेको हो । उनलाई आवश्यक कार्बाहीका लागि त्रिभुवन अन्तर्राष्ट्रिय भन्सार कार्यालयको जिम्मा लगाइएको प्रहरीले जनाएको छ ।
