साउन महिनाको अन्तिम सोमवार आज देशभरका शिवालयहरुमा हिन्द् श्रद्धालुहरुको घुइँचो लागेको छ। साउनको सोमवार भगवान शिवको प्रिय बार भएकाले यस दिन व्रत, पूजापाठ, दान लगायतका काम गरिन्छ।
साउन महिनामा पवित्र नदी, ताल आदिबाट जल लगेर शिवालयमा चढाउने तथा बोल बम मेला पनि लाग्ने गर्छ। बोलबम तीर्थालुहरुको पनि देशभरका शिवालयमा घुइँचो छ। ज्योतिषशास्त्रअनुसार साउने सोमवारमा गरिने शिवको व्रत विशेष फलदायी हुन्छ। साउनको सोमवार व्रत बसी भगवान् शिवको उपासना गरेमा पारिवारिक कल्याण, सुख शान्ति एवं मनोकांक्षा पूरा हुने धार्मिक विश्वास छ।
कचनकवल गाउँपालिकामा सार्वजनिक बिदा
झापाको कचनकवल गाउँपालिकाले साउन २८ गते (सोमबार) स्थानीय सार्वजनिक बिदा दिने निर्णय गरेको छ ।
दक्षिणी झापाको चर्चित धार्मिक स्थलको रुपमा विकसित हुँदै गएको कचनकवल १ को भुतेश्वर महादेव मन्दिरमा गोरु दान ,नगद र जिन्सी दान दिने गरिएपनि त्यस मन्दिरमा भाकलस्वरुप भक्तजनहरूले गोरु र बाछो दान पनि दिने गरेको पाइएको छ ।
आफ्नो मनोकामना पूरा भएपछि त्यस शिवालय मन्दिरमा शिवको बाहान गोरु दान दिने गरेका हुन् । त्यस मन्दिरमा गोरु दानमा आएका गोरुहरूलाई बिक्री गरी आम्दानीमा बाँध्ने गरिएको छ । साउन महिनाको प्रत्येक सोमवार त्यहाँ भक्तजनहरूले जल चढाउने गरेका छन् ।
२०१२ सालमा बैजनाथ राजवंशीले भुतेश्वर महादेवको मन्दिर निर्माण गरिदिएका थिए ।उनैले मन्दिरलाई २ विगाह १६ कट्ठा जग्गा दान दिएका थिए । २०५५ सालदेखि त्यस मन्दिरमा मन्दिर समितिले बोलबम सुरु गरेको हो ।
साउनको प्रत्येक सोमवार जल चढाउने भक्तजनहरूको घुइँचो लाग्ने गरेको छ । भुतेश्वर महादेव मन्दिरलाई धार्मिक एवं पर्यटकीय क्षेत्रको रुपमा विकास गर्न विभिन्न भौतिक संरचनाहरू निर्माण गरिएका छन् । पहिला सँगै जोडिएको भुतेश्वर बाबा र बोलहरिको मन्दिर मात्र रहेको थियो।अहिले बद्रीनाथ ,गणेश ,कार्तिक ,हनुमान ,पार्वती ,शिवशक्ति ,कैलाश र गंगाको मन्दिर निर्माण गरिएको छ । त्यस्तै हवन कुण्ड ,धर्मशाला ,सत्सङ्ग भवन ,प्रसाद वितरण गर्ने घर पनि बनाइएको छ । साउनको अन्तिम सोमवार त्यहाँ भक्तजन र मेला भर्नेहरूको निकै घुइँचो लाग्ने गरेको छ।
आफूले मागेको मनोकामना पूरा हुने आस्था र विश्वासका साथ भारतको विहार ,बङ्गाल र नेपालको विराटनगरसम्मका भक्तजनहरू आउने गरेकाछन्।
