काठमाडौं / कोरोना महामारी शुरु भएसँगै गत चैत सात गतेदेखि बन्द रहेको सदर चिडियाखाना आजवाट खुला भएको छ । सरकारले लागू गरेको स्वास्थ्य मापदण्ड पूर्णरुपमा पालना गर्दै ललितपुरको जावलाखेलस्थित चिडियाखाना खुला गरिएको हो ।
अवलोकन गर्न जानेले अनिवार्य मास्क लगाउने र भौतिक दूरी कायम गर्नुपर्ने नियम लागू गरिएको छ । थप सुरक्षाका लागि चिडियाखानाकै ढोकामा ज्वरो नाप्ने थर्मल गन र सेनिटाइजर मेसिनको व्यवस्था गरिएको छ ।
भीड नहोस् भनेर चिडियाखानाको वेबसाइट वा इसेवामार्फत् टिकट काट्न सकिने व्यवस्था मिलाइएको छ । एकपटकमा ७ सयदेखि ८ सय जनासम्म दर्शक भित्र प्रवेश गर्न पाउने चिडियाखानाले जनाएको छ ।
भित्र प्रवेश गरेको दुईदेखि साढे दुई घण्टामा बाहिर निस्कनुपर्ने नियम बनाइएको छ । चिडियाखाना लामो समयदेखि बन्द हुँदा आर्थिक अभाव झेल्दै आएको छ ।
जाउलाखेलको चिडियाखानामा एक सय १० प्रजातिका एक हजार ८० वन्यजन्तु रहेका छन् । सामान्य अवस्थामा हरेक दिन दुई हजारदेखि तीन हजार दर्शकले चिडियाखाना अवलोकन गर्ने गरेका छन् ।
