झापा। पूर्व–पश्चिम राजमार्गअन्तर्गत मनहरी गाउँपालिका–९ ज्यामिरे सडकखण्डमा शुक्रबारबिहान काँकडभिट्टाबाट नेपालगन्ज जाँदै गरेको ना.५ ख ५५१५ नम्बरको यात्रुवाहक बस दुर्घटनाग्रस्त भएको छ । उक्त दुर्घटनामा परी २० जना यात्रु घाइते भएका छन् ।
प्रत्यक्षदर्शीका अनुसार बसको अगाडिको पट्टा भाँच्चिँदा बस अनियन्त्रित भएर सडकबाट नालीमा कोल्टो परेको थियो । उक्त घटनामा बसमा रहेका २० जनाभन्दा बढी यात्रु घाइते भएका हुन् ।
घाइतेहरूलाई तत्कालै उपचारका लागि नजिकैको मेडिकल संस्थामा लगिएको थियो । त्यसमध्ये ११ जना घाइतेलाई स्थानीय मेडिकल संस्थामा नै उपचार भइरहेको छ भने बाँकी ९ जना घाइतेहरूलाई थप उपचारका लागि चितवन अस्पताल लगिएको छ ।
घटनास्थल तत्कालै प्रहरी पुगेको र घाइतेहरूको उद्धार कार्य तिव्रगतिमा भइरहेको जिल्ला प्रहरी कार्यालय मकवानपुरले जनाएको छ । प्रहरीले घटना सम्बन्धमा अनुसन्धान कार्य शुरु गरेको बताएको छ । यसबारे थप विवरण पछि प्राप्त हुने जनाइएको छ । घाइतेहरूको अवस्था भने सामान्य रहेको प्रहरीले जनाएको छ ।
