काठमाडौं। कोरोना भाइरसको संक्रमणबाट विदेशमा थप तीन जना नेपालीको मृत्यु भएको छ। गैरआवासीय नेपाली संघ एनआएनएका अनुसार यो साता बेलायतमा एक जना र पोर्चुगलमा २ जनाको मृत्यु भएको हो।
एनआएनए अन्तर्गतको स्वास्थ्य समितिका अनुसार योसँगै विदेशमा कोरोना भाइरसबाट निधन हुने नेपालीको कूल संख्या ३१५ पुगेको छ।
एनआएनएको स्वास्थ्य समितिका संयोजक सञ्जिव सापकोटाका अनुसार शनिबार साँझसम्म विभिन्न ५० देशमा रहेका ५३ हजार ३८५ जना नेपालीमा कोरोना संक्रमण देखिएको छ। ती मध्ये ५० हजार ६५६ जना कोरोनामुक्त भएका छन्। यो कूल संक्रमितको ९४ प्रतिशत हो।
एनआएनए स्वास्थ्य समितिका अनुसार यो साता स्पेन, पोल्याण्ड, जापान, युएई, कुवेत, साउदी अरब, कतारमा रहेका थप नेपालीहरूमा कोरोना संक्रमण देखिएको छ।
यस्तै कोरोना भाइरसका कारण नेपालमा एक हजार ८७० जनाको निधन भएको छ। नेपालमा कोरोना भाइरसबाट संक्रमण हुनेको संख्या दुई लाख ६१ हजार ४३८ छ, जसमध्ये दुई लाख ५३ हजार ८५७ जना अर्थात् ९७।१ प्रतिशत कोरोनाबाट मुक्त भएका छन्।
