छोटकरीमा,
- बिहीबार साँझ भएको दुर्घटनाबाट अर्जुनधारा – ७ का दुई व्यक्तिको निधन भएको छ ।
- घुमाउरो बाटोमा मोड्ने क्रममा पछाडिबाट आइरहेको मोटरसाइकलसँग ठोक्किँदा दुर्घटना भएको बताइएको छ ।
- मोटरसाइकलमा सवार अर्जुनधारा -७ का २१ वर्षीय कविराज भनिने कमल चौधरी र २० वर्षीय हेमा महतको निधन भएको जिल्ला प्रहरी कार्यालय झापाले जनाएको छ ।
- गाडी र धनी बुद्धशान्ति- ७ का डिल्लीमान राई इप्रका बुधबारेको नियन्त्रणमा छन् ।
- पुरा पढ्नुहोस्,
बुद्धशान्ति,झापा । झापाको बुद्धशान्ति गाउँपालिका -४ मेची राजमार्गमा दुर्घटना हुँदा दुई जनाको ज्यान गएको छ ।
बिहीबार साँझ भएको दुर्घटनाबाट अर्जुनधारा – ७ का दुई व्यक्तिको निधन भएको छ । दुर्घटना अन्दाजी ४ बजेर ४० मिनेटमा भएको हो । बुद्धशान्तिको बर्ने चिया बगान, बर्ने पर्यटन बजार छेउमा इलामबाट झापा आउँदै गरेको मे- ७ प ९४६२ नम्बरको मोटरसाइकलमा सवार अर्जुनधारा -७ का २१ वर्षीय कविराज भनिने कमल चौधरी र २० वर्षीय हेमा महतको निधन भएको जिल्ला प्रहरी कार्यालय झापाले जनाएको छ ।
साथीसँग इलामको कन्यामबाट फर्कने क्रममा उक्त स्थानमा उनीहरु सवार मोटरसाइकल र इलामबाटै झापा झर्दै गरेको मे- १ ज २०९३ नम्बरको सुमोले घुमाउरो बाटोमा मोड्ने क्रममा पछाडिबाट आइरहेको मोटरसाइकलसँग ठोक्किँदा दुर्घटना भएको बताइएको छ ।
दुर्घटनामा गम्भीर घाइते भएका दुवैलाई उपचारका लागि झापाको बिएन्डसी हस्पिटल लगिएता पनि कविराजलाई चिकित्सकले मृत घोषणा गरेको जिल्ला प्रहरी कार्यालय झापाका प्रवक्ता प्रहरी नायव उपरीक्षक राकेश थापाले बताएका छन् ।
पछाडि सवार हेमा महतलाई घाइते अवस्थामा उद्दार गरी उपचारका लागि बिएन्डसीमै ल्याइएको थियो । टाउको, अनुहार र खुट्टामा चोट लागेकाले उपचार गराउँदा गराउँदै बेलुका ६ः२५ हेमाको पनि निधन भएको प्रहरीले जनाएको छ ।
दुर्घटनामा परेको टाटा सुमोका चालक बुद्धशान्ति -७ का सञ्जय गदाल तत्काल फरार रहेकाले खोज्ने काम भइरहेको प्रहरीले जनाएको छ । तर, गाडी र धनी बुद्धशान्ति- ७ का डिल्लीमान राई इप्रका बुधबारेको नियन्त्रणमा छन् ।
