बुद्धशान्ति – कोरोना कहरका बिच श्रावण २२ गतेदेखि सञ्चालन हुने कक्षा ११ को परीक्षा स्थगित गर्न अनुरोध गर्दै आज बुद्धशान्ति गाउँपालिका शिक्षा शाखामा ज्ञापन पत्र बुझाइएको छ ।
बुद्धशान्तिका संस्थागत विद्यालयका संस्थापक, प्रिन्सिपल, अभिभावक सङ्घका पदाधिकारीको संयुक्त हस्ताक्षर सहित गाउँपालिका शिक्षा शाखा प्रमुख कमल निरौलालाई ज्ञापन पत्र बुझाइएको हो ।
गाउँपालिका अध्यक्ष रमेश कुमार भुजेलको कार्यकक्षमा उपाध्यक्ष मीरा भुर्तेल सहितको उपस्थितिमा कर्णाली एजुकेसन फाउन्डेसनका प्रिन्सिपल गङ्गाराम गड्तौलाले शिक्षा शाखा प्रमुख निरौलालाई बुझाइएको ज्ञापन पत्र बुझाइएको हो ।
कार्यक्रममा मुनामदन एकाडेमीका संस्थापक प्रिन्सिपल चेतन ढुङ्गेलले परीक्षार्थीहरू नै सङ्क्रमित रहेकाले परीक्षा केही समयपछि सार्न अनुरोध गरे । उनले केही विद्यार्थी समेत कोरोना सङ्क्रमित रहेको तथ्य अघि सार्दै अभिभावक तथा विद्यार्थीका छिमेकी सङ्क्रमित रहेकाले आवतजावतमा कठिनाइ हुने समेत बताए ।
त्यस्तै कर्णाली एजुकेसन फाउन्डेसनका कार्यकारी निर्देशक छत्र बहादुर कार्कीले विद्यार्थीहरू त्रसित भएकाले परीक्षा दिन नसक्ने बताएका छन् ।
ज्ञापन पत्र बुझ्दै बुद्धशान्ति शिक्षा शाखा प्रमुख कमल निरौलाले केही दिनमा आफूहरूले निर्णय दिने बताए । उनले कक्षा ११ को परीक्षा विद्यालयले आफ्नो अनुकूलतामा लिन सकिने बताए । सङ्क्रमितको सङ्ख्या बढ्दै गए विद्यालयले आफ्नै तरिकाले परीक्षा सञ्चालन गर्न सकिने उनले बताएका छन् ।
