मलेसियामा एक हप्ताको अवधिमा दोब्बरको संख्यामा कोभिड रोगीको वृद्धि भएको देखिएको छ । डिसेम्बर ९ तारिखसम्म ६ हजार ७ सय ९६ केसहरु रहेकोमा बुधबार उक्त संख्यामा करिब दोब्बरले बढेर १२ हजार ७ सय ५७ पुगेको मलेसियाका स्वास्थ्य महानिर्देशक डा. मुहम्मद राड्जी अबु हसनले तथ्याङ्क सार्वजनिक गरेका छन् ।
नयाँ संक्रमितको संख्या बढेपनि मलेसियाको समग्र अवस्था अझै नियन्त्रणमा रहेको र विद्यमान स्वास्थ्य सेवालाई बोझ नपर्ने जनाइएको छ । कोभिड केसहरुमा अचानक तीव्र वृद्धि देखिएपनि अधिकांश संक्रमितलाई हल्का लक्षणहरु देखापरेको र उनीहरुलाई अस्पतालमा उपचार आवश्यक नपर्ने पनि बताइएको छ ।
तत्कालका लागि पर्यटक तथा विदेशी कामदार आवागमनमा कुनै निर्देशन जारी नगरिएको, तर स्वास्थ्यकर्मीलाई उच्च सतर्कता अपनाउन निर्देश गरिएको बताएको मलेसियन अनलाइन दि स्टारले उल्लेख गरेको छ । कोभिड–१९ का केसहरुको बढ्दो प्रवृत्ति धेरै छिमेकी देशहरु र मलेसियालगायत विश्वव्यापीरुपमा पनि रिपोर्ट गरिएको बताइएको छ ।
