झापा,एजेन्सी– कोरोना भाइरसको महामारीका कारण अमेरिकामा एक लाख ४० हजारभन्दा बढी बालबालिका अभिभावकविहीन भएका छन् ।
‘विजनेश इन्साइडर’ले तयार पारेको प्रतिवेदनमा महामारीका कारण बालबालिकाको जीवनमा दिर्घकालीन असर परेको उल्लेख छ ।
सो प्रतिवेदन अनुसार देशका हरेक ५०० मध्ये एक जना अभिभावकविहीन हुनु परेको देखिएको छ । अभिभावकविहीन भएपछि बालबालिकाहरूले मनोवैज्ञानिक तथा आर्थिक समस्या भोग्नु परेको अधिकारीहरूले जनाएका छन् ।
अभिभावक गुमाएका बालबालिकाहरू मध्ये धेरै बालबालिकाहरू अल्पसङ्ख्यक तथा सानो समुदायका धेरै रहेको पाइएको छ ।
कोरोना भाइरसको महामारीबाट अत्यधिक धेरै प्रभावित देशको अग्रसूचीमा अमेरिका पर्दछ । कोरोनाका कारण मृत्यु भएका, सङ्क्रमित भएका र अहिले पनि सङ्क्रमित अवस्थामै रहेकाहरूको सङ्ख्या अमेरिकामै सबैभन्दा धेरै रहेको छ ।
कोरोना भाइरसका कारण अमेरिकामा अहिलेसम्म सात लाख ६४ हजारभन्दा बढीको मृत्यु भएको अधिकारीहरूले जनाएका छन् ।
