तीर्थ तिम्सिना, बुद्धशान्ति (पालिका सन्देश) । गुलमोहरलाई फ्रान्समा ‘स्वर्गको फूल’ भनेर उपनाम दिइन्छ । मेची राजमार्गको बर्ने–कालिखोला सडक खण्डमा फक्रिइरहेका यी फूलनजिक पुग्दा भने लाग्छ– बर्ने त स्वर्ग नै हो कि ! अर्थात्, गुलमोहरले बुद्धशान्तिको बर्ने स्वर्गझैं सिँगारेको छ ।
गुल्मोहरले यतिबेला धेरैलाई मोहित पारेको छ । चिया बगान सडकछेउमा फुलेका गुलमोहरको फूल मनै लोभ्याउने दृष्य बनेको छ । सडकको छेउछाउमा रातै भएर फुलेका गुलमोहरले बुद्धशान्तिलाई साँचिक्कै स्वर्गको आभाष दिलाएको छ । सुन्दर बर्ने चिया कमान झन् सुन्दर बनेको छ ।
‘फूलको नजिक गएर फोटो खिच्दा आकाशले नै रातो पछ्यौरी ओढिरहेको भान हुन्छ,’ गुलमोहरमा सेल्फी लिँदै गरेकी झापा धुलाबारीकी समिक्षा गौतमले भनिन्, ‘प्रकृतिको यति अनुपम दृश्य अन्त कहाँ पाइन्छ र ?’उनी मात्र होइनन्, अहिले बर्नेमा रातै भएर फूलेको गुलमोहरलाई पृष्ठभूमिमा पारेर तस्बिर खिच्नेको भीड लाग्ने गरेको छ । यहाँ जो कोहीले आफ्ना तस्बिर कैद गर्न छुटाउँदैनन् ।
हरेक वसन्त ऋतुमा बुद्धशान्तिको सौन्दर्यता थप्ने ‘गुलमोहर’ले यो वर्ष पनि ढकमक्क बनाएको छ । कोरोना कालको माहामारीको समयदेखी चर्चा बटुलेको यो रुख यतिबेला मेची राजमार्ग मात्रै होइन धेरै नेपाली र केही भारतीय नागरिकका सामाजिक सञ्जाल, टिकटकमा समेत ढक्कमक्क फूलेको छ । फेसबुकमा भाइरल भएको देखेर पारिवारिक घुमघाम गर्न इलामबाट आएको सुमन अधिकारीको परिवारले झन्डै तीन घण्टा शिरिषको फेदमा बिताए । उनीमात्रै होइन् पूर्वीनामा काँकरभिट्टाबाट गाडी नै रिर्जव गरेर मनिष रसाइलीको परिवार समेत गुलमोहरमा टिकटक बनाउन आए ।
पछिल्लो समय रुखको आडमा आएर शितलता लिने, फोटो खिच्ने र टिकटक बनाउने र सामाजिक सञ्जालमा अपलोड गर्ने क्रम बढ्दै गएको छ । दुई–तीन बर्ष अघि देखि मात्रै यसरी सामाजिक सञ्जालबाट यस क्षेत्रको प्रचारप्रसार भएको स्थानीय दिनेश तिम्सिना बताउँछन् । पछिल्लो वर्षदेखी अत्याधिक भिड बढ्न थालेपछि स्थानीय निकायले पनि यतिबेला यो क्षेत्रलाई चासोपुर्वक हेर्न थालेको छ ।
बुद्धशान्ति गाउँपालिकाले सो क्षेत्रको अघिल्लो आर्थिक बर्षमा ६ लाख बराबरको भुइँमा ब्लक ओछ्याएको छ भने वडा नं ४ ले चार लाख मुल्य बराबरको प्रतिक्षालय निर्माण गरेको थियो । गाउँपालिकाले बाह्रैमास पर्यटकलाई भित्र्याउन सो क्षेत्रबाट देवीबस्ती जानेबाटोमा करिव ३० लाख लागतमा ब्लक ओछ्याइने र घोडा सयर गर्ने किसमिको बाटो तयार गरिने बताए । उनले सो क्षेत्रमा सिजनमा मात्रै व्यापार गर्ने भन्दा बाह्रैमास व्यापार गर्ने ४ जना व्यवसायीलाई ४ थान व्यपारीक ठेला समेत हस्तान्तरण गरेको बताए । आगामी दिनमा व्यापार गर्ने बढेमा अझ वितरण गर्ने समेत बताए ।
शनिवारका दिन गुलमोहरमा तस्बिर लिने करिव १० हजार रहेको आँकलन गरिएको छ । हरेक दिन २ हजार बढीले उक्त रुखमा फोटो खिच्दै आएका छन् । गुलमोहरको सुन्दरताले अहिले बुद्धशान्ति सहित झापाका विभिन्न स्थान रंगीन बनेका छन् । सोमबार सो क्षेत्रमा गाउँपालिकाको आयोजनामा सरसफाई कार्यक्रम समेत गरिएको थियो ।
