काठमाडौं । काभ्रेको रोशी गाउँपालिका–३ भञ्ज्याङगाउँमा एक महिलाको हत्या आरोपमा उनकै छोरा पक्राउ परेका छन् । १६ कात्तिकको दिउँसो सवा ४ बजेतिर भ्ञ्ज्याङगाउँमा साइलीकाजी भनिने ६९ वर्षीया माइली लामा आफ्नै घरको भान्साकोठामा मृत अवस्थामा भेटिएकी थिइन् । प्रहरी चौकी खहरेपाँगु र इलाका प्रहरी कार्यालय मंगलटारको टोलीेले घटनाको अनुसन्धान सुरु गरेको थियो ।
प्रारम्भिक अनुसन्धानको क्रममा साइलीकाजीको हत्या भएको हुनसक्ने भन्दै तालिम प्राप्त कुकुरमार्फत स्निफिङ समेत गराइएको थियो । सो क्रममा साइलीकाजीको हत्या उनकै छोरा २८ वर्षका फुर्साङको संलग्नता रहेको संकेत पाएपछि उनलाई पक्राउ गरिएको जिल्ला प्रहरी कार्यालय काभ्रेका डीएसपी मीनबहादुर घलेले बताए ।
फुर्साङलाई प्रहरीले १८ गते उनकै घरबाट पक्राउ गरेको हो । प्रारम्भिक सोधपुछका क्रममा फुर्साङले आमाको कानको सुनको रिङ र नगदको लोभले हत्या गरेको खुलको घलेले बताए । उनीविरुद्ध कर्तव्य ज्यानको कसुरमा अनुसन्धानका लागि ७ दिन हिरासतमा राख्न जिल्ला अदालत काभ्रेबाट अनुमति लिएको प्रहरीले जनाएको छ ।
