झापा । डेंगु संक्रमणका कारण झापामा एक बालकको मृत्यु भएको छ । स्थानीय न्यूटन्स एजुकेशन एकेडेमीको कक्षा १ मा अध्ययनरत ८ वर्षीय बालक आलोकजंग बस्नेतको डेंगु संक्रमणबाट मृत्यु भएको हो ।
उनको घर बिर्तामोड नगरपालिका ४ भएको न्यूटन्स एजुकेशन एकेडेमीका प्रधानाध्यापक देवेन्द्र हुमागाँईले बताउनुभयो । सुरुमा ज्वरो आएपछि ती बालकको स्वास्थ्य परीक्षण गराउँदा डेंगु पुष्टि भएको थियोे ।
चार दिनसम्म स्थानीय झापा नेशनल मेडिकल बिर्तामोडमा उपचार गराइएको थियोे । त्यसपछि उनलाई थप उपचारका लागि नोवल हस्पिटल विराटनगर लगिएको थियो । उनको उपचारकै क्रममा उनको मृत्यु भएको आफन्तले जनाएका छन् ।
यस वर्ष झापामा डेंगु संक्रमणबाट मृत्यु हुनेको संख्या दुई पुगेको छ । यसअघि झापामा साउन २५ गते एक शिक्षिका अनिता पौडेलको डेंगुका कारण मृत्यु भएको थियोे ।
चिल्ड्रेन गार्डेन अंग्रेजी विद्यालय हल्दिबारीमा कार्यरत शिक्षिका पौडेलको उपचारका क्रममा विएण्डसी अस्पताल बिर्तामोडमा मृत्यु भएको थियोे । ४० वर्षीया अनिताको घर हल्दिबारी गाउँपालिका ४ हो ।
