काठमाडौं । प्रदेश १, बागमती, गण्डकी तथा लुम्बिनी प्रदेशका पहाडी भू–भागहरूमा आजको मौसममा आंशिकदेखि सामान्य बदली रहने जल तथा मौसम पूर्वानुमान महाशाखाले जनाएको छ । यसबाहेकका क्षेत्रको मौसम आज सामान्यतया सफा रहने मौसमविद्ले बताएका छन् ।
प्रदेश १, बागमती र गण्डकी प्रदेशका पहाडी भू–भागका केी स्थानमा हल्का वर्षाको पनि सम्भावना छ । यीसहित सुदूरपश्चिम प्रदेशका उच्च पहाडी तथा हिमाली भू–भागका केही स्थानहरूमा हल्का हिमपातको पनि सम्भावना रहेको महाशाखाले जनाएको छ ।
अहिले बिहान प्रदेश १, बागमती र गण्डकी प्रदेशका पहाडी भू–भागहरूमा आंशिकदेखि सामान्य बदली रही अन्य पहाडी भू–भागहरूमा आंशिक बदली रहेको छ । तराईका भू–भागमा तुँवालो लागेको छ ।
आज राति देशका पहाडी भू–भागहरूमा आंशिक बदली रही बाँकी भू–भागमा मौसम सामान्यतया सफा रहने महाशाखाले जनाएको छ । यस्तै पहाडका केही स्थानमा राति पनि हल्का वर्षा र हिमपातको सम्भावना रहेको छ ।
नेपालको पूर्वी भू–भागमा बंगलादेश आसपासमा रहेको न्यून चापीय प्रणालीको आंशिक प्रभाव रहेको महाशाखाले जनाएको छ ।
